Dearness Allowance Hike: गणपतीनंतर आता दसरा आणि दिवाळीचे वेध लागले आहेत. अशा सणांच्या दिवसांत केंद्र सरकार आपल्या कर्मचाऱ्यांसाठी एक आनंदाची बातमी घेऊन येत आहे. यावर्षी दिवाळीच्या मुहूर्तावर सरकार केंद्रीय कर्मचाऱ्यांच्या महागाई भत्त्यात वाढ करण्याची शक्यता आहे.
महागाई भत्ता (DA) वाढणार
केंद्र सरकार महागाई भत्त्यामध्ये ३ टक्क्यांनी वाढ करण्याची शक्यता आहे, ज्यामुळे १.२ कोटी केंद्रीय कर्मचारी आणि पेन्शनधारकांना थेट फायदा होईल.
- सध्याचा महागाई भत्ता: ५५%
- प्रस्तावित वाढ: ३%
- नवीन महागाई भत्ता: ५८%
ही वाढ जुलै २०२५ पासून लागू होईल, त्यामुळे कर्मचाऱ्यांना ऑक्टोबरच्या पगारात तीन महिन्यांचा थकबाकी (Arrears) मिळण्याची शक्यता आहे. गेल्या वर्षीही सरकारने दिवाळीच्या आधी महागाई भत्त्याची घोषणा केली होती, त्यामुळे यंदाही अशीच अपेक्षा आहे.
पगार आणि पेन्शनवर कसा परिणाम होईल?
महागाई भत्त्याची वाढ थेट मूळ वेतन (Basic Salary) आणि मूळ पेन्शनवर अवलंबून असते.
| तपशील | मूळ वेतन/पेन्शन (उदा.) | सध्याचा DA (५५%) | नवीन DA (५८%) | मासिक वाढ |
| कर्मचारी | ₹५०,००० | ₹२७,५०० | ₹२९,००० | ₹१,५०० |
| पेन्शनर | ₹३०,००० | ₹१६,५०० | ₹१७,४०० | ₹९०० |
महागाई भत्ता कसा ठरतो?
महागाई भत्ता ठरवण्यासाठी ७ व्या वेतन आयोगाकडून ग्राहक किंमत निर्देशांक (CPI-IW) वापरला जातो. जुलै २०२४ ते जून २०२५ या कालावधीतील CPI-IW ची सरासरी १४३.६ इतकी आली, ज्यामुळे महागाई भत्ता ५८% होण्याचा अंदाज आहे.
हा ७ व्या वेतन आयोगाचा शेवटचा महागाई भत्ता असण्याची शक्यता आहे, कारण हा आयोग ३१ डिसेंबर २०२५ रोजी समाप्त होत आहे. ८ व्या वेतन आयोगाची चर्चा सुरू झाली असली तरी, त्याची अंमलबजावणी २०२७ च्या शेवटी किंवा २०२८ च्या सुरुवातीला होण्याची शक्यता आहे.
